دنیا کا سب سے بڑا کمرشل سفری جہاز اے-380 مجموعی طور پر 800 مسافروں کو لے کر کل کو نیو اسلام آباد ائرپورٹ پہنچے گا

پاکستان کی تاریخ میں پہلی مرتبہ دنیا کا سب سے بڑا کمرشل سفری جہاز اے-380 مجموعی طور پر 800 مسافروں کو لے کر کل 8 جولائی کو دبئی سے نیو اسلام آباد ائرپورٹ پہنچے گا۔سول ایوی ایشن اتھارٹی (سی اے اے) کی جانب سے جاری اعلامیے کے مطابق نیواسلام آباد ائرپورٹ میں اس حوالے سے تمام انتظامات مکمل کر لیے گئے ہیں اور تمام اسٹاف کو اس روز اپنی حاضری یقینی بنانے کا حکم دیتے ہوئے مراسلہ بھی جاری کر دیا گیا ہے۔خیال رہے کہ پاکستان کی تاریخ میں پہلی مرتبہ دنیا کا سب سے بڑاکمرشل سفری جہاز نجی ائیرلائن کا اے-380 جہازکل 8 جولائی کو اسلام آبادائرپورٹ پر دن 12 بج کر 10 پر اترے گا۔اس سے قبل پاکستان کے 42 ہوائی اڈوں میں اس طرح کے بڑے جہاز کے لینڈ کرنے کی سہولت میسر نہیں تھی۔سول ایوی ایشن حکام کا کہنا تھا کہ اے-380 جہاز کا اسلام آبادایئرپورٹ پر اترنا ملکی تاریخ میں ایک بڑا سنگ میل ہے کیونکہ ہم ترقی یافتہ ممالک کے ہوائی اڈوں کا مقابلہ کر رہے ہیں۔دوسری جانب یہ قدم سول ایوی ایشن اتھارٹی کی جانب سے فراہم کردہ خدمات کے لیے امتحان بھی ہے جبکہ پاکستان کے لیے قابل فخر بھی ہے، اس جہاز میں مسافروں کو جدید ترین سفری سہولیات میسر ہیں جو بین الاقوامی معیار کے مطابق ہیں۔سول ایوی ایشن حکام کا کہنا تھا کہ ہماری توجہ اے-380 کی لینڈنگ پر ضرور ہو گی مگر نیو اسلام آباد ایئرپورٹ پر دیگر پروازوں کے شیڈول میں کوئی تبدیلی نہیں کی ہوگی اور مسافروں سے بھی معاملات میں بھی کوئی خلل نہیں ہوگا۔حکام کا کہنا ہے کہ نیو انٹرنیشنل ایئرپورٹ میں اتنے انتظامات ضرور موجود ہیں جو بیک وقت اے-380 سمیت دیگر جہازوں کے مسافروں کو سہولیات بہم پہنچا سکیں تاہم سینکڑوں مسافروں کے نیو ایئرپورٹ پر پہنچنے سے دیگر پروازوں کا شیڈول بھی متاثر ہونے کا خدشہ ہے۔

Comments

comments